14 iyul 2011-ci il tarixdə Azpetrol Şirkəti "Cəngi"də (Qobustan rayonu) özünün yeni yanacaqdoldurma məntəqəsini açdı. Bu, Azpetrolun sayca 74-cü yanacaqdoldurma məntəqəsidir.
Yeni məntəqənin açılışında Qobustan Rayon İcra Hakimiyyətinin nümayəndələri, Beynəlxalq Hokkey Federasiyasının prezidenti Leandro Neqre və Avropa Hokkey Federasiyasının baş katibi David Bellberni də iştirak edirdilər.
Məntəqənin açılışı zamanı Azpetrol Şirkətinin baş direktoru Hüseynağa Rəhimov öz çıxışında qeyd etdi ki, bugünkü tədbir hamımız üçün çox əhəmiyyətli bir günə - bütün mənalı ömrünü qurub-yaratmağa həsr etmiş ümummilli liderimiz, ulu öndər Heydər Əliyevin ilk dəfə 1969-cu ildə Azərbaycana rəhbərlik etməyə başladığı günə təsadüf etdiyindən xüsusilə əlamətdardır. Eyni zamanda, böyük məmnunluq hissi ilə bildirirəm ki, sabah "Azpetrol" Şirkətinin yaradılmasının 14-cü ili tamam olur. Bu baxımdan, "Cəngi" yanacaqdoldurma məntəqəsinin bu gün istifadəyə verilməsi bizim üçün üçqat bayramdır.
Şirkətin rəhbəri daha sonra onu da vurğuladı ki, respublika iqtisadiyyatına qoyulan böyük həcmli investisiyaların əksər hissəsi daxili sərmayələrdən ibarətdir. Elə təkcə bu fakt Azərbaycanı çox güclü və dayanıqlı, özəl sektorun da inkişafı üçün münbit şəraitin bərqərar olduğu bir iqtisadiyyata malik dövlət kimi səciyyələndirir. Özəl sektorun Azərbaycanda gedən uğurlu proseslərdən bəhrələnərək günü-gündən güclənməsi isə möhtərəm Prezidentimiz cənab İlham Əliyevin birbaşa rəhbərliyi və nəzarəti altında keçirilən uğurlu və ardıcıl siyasətin məntiqi nəticəsidir. Ölkəmizin iqtisadi inkişafı baxımından son illərdə əldə etdiyi çox yüksək göstəricilər, sosial həyatımızın bütün sahələrində davamlı tərəqqi 2004-2008 və 2009-2013-cü illər üçün qəbul olunmuş regionların sosial-iqtisadi inkişafı üzrə dövlət proqramlarının uğurla həyata keçirilməsi üçün tam zəmin yaratmışdır.
Şirkət hal-hazırda digər bölgələrdə də yanacaqdoldurma şəbəkəsinin genişlənməsi üzrə işlər aparır və yeni yanacaqdoldurma məqtəqələrinin açılması istiqamətində tikinti işlərini davam etdirir.
Belə ki, bu il Azpetrol Göygöldə, İsmayıllıda və Şəkidə yeni yanacaqdoldurma məntəqələrinin istismara verilməsini nəzərdə tutur.

Azpetrol Şirkətinin mətbuat xidməti