"Azərbaycan Respublikasında biznesin idarə olunması sahəsində kadrların ixtisasının artırılması üzrə Almaniya Federativ Respublikasının Federal İqtisadiyyat və Texnologiyalar Nazirliyi ilə Azərbaycan Respublikasının İqtisadi İnkişaf Nazirliyi arasında əməkdaşlıq haqqında Anlaşma Memorandumu" çərçivəsində sahibkarların və menecerlərin 2011-ci ilin noyabr-dekabr aylarında Almaniyada tədris və təcrübə keçməsi sahəsində müvafiq hazırlıq işlərinin gedişini müzakirə etmək məqsədilə Almaniya Beynəlxalq Əməkdaşlıq Cəmiyyətinin (GİZ) nümayəndələri Bakıda səfərdədirlər.
Almaniya Beynəlxalq Əməkdaşlıq Cəmiyyətinin və Bakı Biznes Tədris Mərkəzinin nümayəndələri "M-Line" ASC, "VAQA" MMC və "Azərduz" müəssisəsində olmuş, proqram barədə ətraflı məlumat vermişlər.
İqtisadi İnkişaf Nazirliyinin dəstəyi, Bakı Biznes Tədris Mərkəzinin təşkilatçılığı, GİZ-in iştirakı ilə müxtəlif sahələrdə fəaliyyət göstərən 60-dan çox sahibkar və menecerlə görüş keçirilmişdir.
Görüşdə nazirliyin sahibkarlığın inkişafı siyasəti şöbəsinin müdiri Zaur Qasımov Almaniyada təşkil edilmiş ixtisasartırma kursları barədə məlumat vermiş, bu proqramın gələcəkdə də davam etdirilməsinin azərbaycanlı iş adamlarının menecment sahəsində bu ölkənin qabaqcıl şirkətlərində beynəlxalq təcrübəyə yiyələnməsi, işgüzar əlaqələrin genişlənməsi baxımından əhəmiyyətini vurğulamışdır.
Bakı Biznes Tədris Mərkəzinin direktoru Akif Fərruxov, GİZ-in layihələr üzrə meneceri Ronald Şults və təşkilatın eksperti Vladislav Belov çıxışlarında "Azərbaycan Respublikasında biznesin idarə olunması sahəsində kadrların ixtisasının artırılması üzrə Almaniya-Azərbaycan ikitərəfli Proqramı" və proqram çərçivəsində indiyədək keçirilmiş ixtisasartırma kurslarının nəticələri barədə məlumat vermişlər.
Tədbirdə, həmçinin proqramla bağlı təqdimatlar keçirilmiş, GİZ-in fəaliyyəti barədə materiallar paylanmış, sahibkarları maraqlandıran suallar cavablandırılmışdır.

AzərTAc