Azərbaycanın valyuta ehtiyatlarının həcmi 40 milyard ABŞ dollarına çatıb. Bu, ölkənin xarici borcunu 7 dəfə üstələyir. Bu barədə iqtisadi inkişaf naziri Şahin Mustafayev Dünya Azərbaycanlılarının III Qurultayının iştirakçısı olan Azərbaycan diasporu nümayəndələrinin dövlət qurumlarının rəhbərləri ilə görüşündə bildirib.
Onun sözlərinə görə, valyuta ehtiyatlarının 40 milyard dollar, illik büdcənin isə 20 milyard dollar olması Azərbaycanda iqtisadi inkişafın yüksək göstəricisidir.
Şahin Mustafayev Azərbaycanda sənayeləşmə prosesinin başlandığını qeyd edib. Bu proses zamanı dünyada öncül texnologiyaların Azərbaycana gətirilməsi, sənaye şəhərciklərinin yaradılması nəzərdə tutulub. Ş.Mustafayev bildirib ki, sənaye şəhərciklərinin Azərbaycanın Sumqayıt, Gəncə şəhərlərində və Bakının Qaradağ rayonunda yaradılması planlaşdırılır.