İyunun 29-da "Akkord Sənaye Tikinti İnvestisiya Korporasiyası" Açıq Səhmdar Cəmiyyəti (ASC) və Fransanın tanınmış "Bouygues Group" (Buiq Qrup) Şirkətlər Qrupuna daxil olan "Bouygues Travaux Publics" şirkəti arasında Anlaşma Memorandumu imzalanmışdır.
"Akkord Sənaye Tikinti İnvestisiya Korporasiyası"nın ictimaiyyətlə əlaqələr və mətbuat xidmətindən aldığımız mglumata görə, mərasimdə Fransanın "Bouygues Travaux Publics" şirkətinin dünyanın infrastruktur layihələri ilə məşğul olan ən iri inşaat şirkətlərindən biri olduğu qeyd olunmuşdur. "Bouygues Travaux Publics" xüsusilə metro tunellərinin tikintisi sahəsində geniş və zəngin təcrübəyə malikdir. İmzalanan Anlaşma Memorandumu Azərbaycanda infrastruktur layihələrində, həmçinin Bakıda yeni metropoliten xətləri və stansiyalarının tikintisində birgə iştirak məqsədlərini və işbirliyinin ilkin şərtlərini ehtiva edir.
Mərasimdə hər iki şirkətin təqdimat xarakterli video süjetləri nümayiş olunduqdan sonra Anlaşma Memorandumu imzalanıb.
Memorandumu "Akkord Sənaye Tikinti İnvestisiya Korporasiyası" ASC-nin baş direktoru Xaqani Quluzadə və "Bouygues Travaux Publics" inşaat şirkətinin icraçı direktoru Jan-Pyer Marqolin imzalayıblar.

"Xalq qəzeti"