bp Azərbaycan şirkəti özünün "Azəri-Çıraq-Günəşli", Bakı-Tbilisi-Ceyhan, "Şahdəniz" və Cənubi Qafqaz boru kəməri layihələrinin tərəfdaşları ilə birgə "Alıcı ilə tanış ol" adlı sərgisini təşkil etmişdi. Xatırladaq ki, Hyatt konfrans mərkəzində keçirilən bir günlük tədbir bp və tərəfdaşlarının Azərbaycanda həyata keçirdikləri layihələrdə yerli şirkətlərin iştirakını artırmaq məqsədi daşıyırdı. Bu məqsədə isə yerli şirkətlərin bacarıqlarını artırmaq, bizneslərini inkişaf etdirmək və onlara öz potensial müştəriləri ilə əlaqələr yaratmaqda kömək etmək vasitəsilə nail olunur. 
"Alıcı ilə tanış ol" tədbiri konkret olaraq yerli şirkətlərə öz məhsul və xidmətlərini potensial alıcılara təqdim etmək imkanı yaratmaq üçün nəzərdə tutulmuşdu. Tədbir yerli şirkətlərin böyük bir qrupuna neft və qaz sənayesinin təchizat sahəsində fəal iştirak edən beynəlxalq və yerli şirkətlərlə tanış olmaq imkanı yaratdı. Sərgi, həm də yerli şirkətlər üçün bp və digər böyük beynəlxalq şirkətlər kimi potensial alıcılara nə təklif edə biləcəklərini birbaşa təqdim etmək imkanı qazandırdı. Digər tərəfdən, bu tədbir həm də potensial alıcılar üçün yerli bazarı qiymətləndirmək və onlara ölkə daxilində nələrin təklif olunduğunu müəyyənləşdirmək üçün çox yaxşı fürsət idi.
Tədbirdə 90-a yaxın yerli şirkət iştirak edirdi ki, onların da hamısı biznes xidmətləri, əməliyyatlara dəstək, mühəndis-layihələndirmə, tikinti, maddi-texniki tədarük, tullantıların idarə edilməsi və digər kateqoriyaları təmsil edən müəssisələr idi. Onlar isə bp və onun tərəfdaşlarının sponsorluq etdiyi milyonlarla dollar dəyərində olan Sahibkarlığın İnkişafı və Təlim Proqramının iştirakçısı olan şirkətlərdir. Bundan əlavə, tədbirdə təxminən 50 şirkət və təşkilat da potensial alıcı kimi iştirak edirdi.
bp-nin müqavilələrin icrası üzrə meneceri Pol Evans tədbirin açılışında çıxış edərək dedi: "Yerli şirkətlər üçün bu imkanı yaratmağımızdan çox məmnunuq. Zənnimizcə, bu, bp və onun tərəfdaşlarının regionda təşkil etdiyi ilk bu tipli sərgidir. Əməliyyatlarımızda yerli şirkətlərin iştirakının artırılması bizim strateji məqsədimizdir. Bu məqsədə çatmaq üçün biz Azərbaycandakı şirkətlərə regionda çox mühüm neft-qaz işlənmələrinə dəstək olmaq üçün öz bizneslərini inkişaf etdirmək məqsədilə kömək edirik. Məhz buna görə də 3 il bundan əvvəl Sahibkarlığın İnkişafı və Təlim Proqramı da daxil olmaqla müxtəlif proqramlar təsis etmişik. İndiyədək bu proqramı 90-dək yerli şirkət başa vurmuşdur ki, onlardan da 17-si xüsusilə uğurlu olmuşdur. Həmin şirkətlər bp ilə ümumi dəyəri 65 milyon dollardan artıq müqavilələr bağlayaraq yeni iş yerləri açmağa və sərmayələr qoymağa nail olmuşlar. Onlar hazırda bp-nin Azərbaycanda və Gürcüstanda həyata keçirdiyi əməliyyatlarda podratçı kimi iştirak edirlər. Beş il bundan əvvəl bp ölkə daxilindəki xərclərini ikiqat artıraraq ildə 1 milyard dollara çatdırmaq məqsədini açıqlamışdı. Bura isə həm birbaşa, həm də öz beynəlxalq podratçıları vasitəsilə dolayısı ilə xərclədiyi məbləğ daxildir. Böyük məmnuniyyətlə bildirirəm ki, biz bu məqsədə artıq 2009-cu ildən başlayarq nail olmuşuq və bundan sonra da yerli bazarın inkişafına kömək etmək öhdəliyimizə sadiq qalacağıq."

Mirbağır YAQUBZADƏ, "Xalq qəzeti"