Azərbaycan Respublikası Dövlət Neft Şirkətinin birinci vitse-prezidenti, akademik Xoşbəxt Yusifzadə bildirmişdir ki, "Şahdəniz" layihəsi çərçivəsində Azərbaycan Beynəlxalq Əməliyyat Şirkəti tərəfindən yatağın işlənilməsinin daha da intensivləşdirilməsi məqsədilə nəzərdə tutulan "Şahdəniz-2" layihəsi üzərində işlər aparılır.
Layihənin ikinci fazası "Şahdəniz" strukturunun qərb qanadını, şimal və cənub periklinallarında fasilə lay dəstənin, eləcə də Balaxanı lay dəstənin VIII və X horizontlarının işlənilməsini əhatə edəcəkdir. Layihə çərçivəsində yatağın şimal periklinalında dərinliyi 6 min 408 metr olan SDX-6 quyusu qazılaraq işə buraxılmışdır. Hazırda SDX-7 quyusu qazılmaqdadır. Bu quyunun layihə dərinliyi 6 min 167 metr olacaqdır.
Hazırda "Şahdəniz" yatağından ildə 9 milyard kubmetr qaz hasil edilirsə, "Faza-2"nin həyata keçirilməsi qaz hasilatının ildə 25 milyard kubmetrədək artırılmasına imkan verəcəkdir.

AzərTAc