"Azəri", "Çıraq" və dərinsulu "Günəşli" yataqlar blokunun çıxarıla bilən ehtiyatları 1 milyard ton neft və 350 milyard kubmetr qaz həcmində qiymətləndirilir. Blok üzrə çıxarıla bilən ehtiyatların mənimsənilməsi üçün yeni texnika və texnologiyanın tətbiq edilməsi ilə layların neftvermə əmsalı yüksəldilir.
Bu sözləri Azərbaycan Respublikası Dövlət Neft Şirkətinin birinci vitse-prezidenti, akademik Xoşbəxt Yusifzadə bildirmişdir.
Qeyd edilmişdir ki, yataqların neftvermə əmsalını yüksəltmək məqsədi ilə laylara su və qaz vurulur. Yataqlarda suvurma prosesinə - "Çıraq"da 2000-ci, "Azəri"də 2007-ci, dərinsulu "Günəşli"də isə 2008-ci ildə başlanılmışdır. Laylara indiyədək 135 milyon kubmetr su vurulmuşdur.
2006-cı ilin may ayından isə "Mərkəzi Azəri" yatağında lay təzyiqinin saxlanılması üçün hasil edilmiş səmt qazının təkrar laya vurulması prosesinə başlanılmışdır. Bu günədək laya 23 milyard kubmetr qaz vurulmuşdur.

AzərTAc