Azərbaycan Respublikasının Dövlət Statistika Komitəsi məlumat verir ki, cari ilin yanvar-may aylarında ölkə üzrə pərakəndə əmtəə dövriyyəsinin həcmi 2010-cu ilin müvafiq dövrünün göstəricisini 9,6 faiz üstələyərək 6,2 milyard manata çatmışdır. İstehlak mallarının 14,5 faizi hüquqi, 85,5 faizi fiziki şəxslər tərəfindən realizə olunmuşdur.
Əhalinin ticarət şəbəkələrində xərclədiyi vəsaitin 3,9 milyard manatı ərzaq məhsullarının, 2,3 milyard manatı isə qeyri-ərzaq mallarının alınmasına sərf olunmuşdur.
Beş ay ərzində xidmət şəbəkələri vasitəsilə əhaliyə 1,9 milyard manatlıq və ya əvvəlki ilin eyni dövrü ilə müqayisədə 8,8 faiz çox pullu xidmətlər göstərilmişdir. Xidmətlərin 77,7 faizi hüquqi, 22,3 faizi fiziki şəxslərin payına düşmüş və onlar tərəfindən əhaliyə müvafiq olaraq 7,1 və 15,2 faiz çox pullu xidmət göstərilmişdir.

T. ƏLİYEV, "Xalq qəzeti"