Belarus Milli Elmlər Akademiyası (BMEA) idarə heyəti sədrinin müavini Sergey Raxmanovun başçılığı ilə Bakıda səfərdə olan Belarus nümayəndə heyəti Azərbaycan Milli Aviasiya Akademiyasında (AMAA) olmuşdur.
AMAA-dan bildirmişlər ki, nümayəndə heyətinə Belarus MEA-nın İşıq Diodları və Optik Elektron Texnologiyalar Mərkəzinin direktoru Yuri Trofimov və bu mərkəzin marketinq və logistika şöbəsinin rəisi Oleq Kiselyov daxildirlər.
AMAA-nın rektoru, akademik Arif Paşayevlə görüşdə Azərbaycanda Belarusun işıq diodları texnologiyalarından istifadə etməklə işıq avadanlığı istehsalının qaydaya salınması məsələləri müzakirə edilmişdir. Bu layihənin texniki-iqtisadi əsaslandırmasını yaxın vaxtlarda hazırlamaq barədə razılaşma əldə olunmuşdur. İlin axırınadək Azərbaycanda enerjiyə qənaət edən yüksək texnologiyalı müvafiq məhsulun istehsalını qaydaya salmaq planlaşdırılır.
Belarus nümayəndə heyəti BMEA-nın Azərbaycanda tətbiqi perspektivli olan digər innovasiya layihələrini də təqdim etmişdir.
Xatırladaq ki, səfər proqramında Azərbaycan Milli Elmlər Akademiyasında, Azərbaycan Respublikası Prezidenti yanında Elmin İnkişafı Fondunda, digər elmi qurumlarda görüşlər nəzərdə tutulmuşdur.
Həmin görüşlərdə Belarus nümayəndə heyəti BMEA-nın gələcəkdə Azərbaycan təşkilatları ilə birlikdə istehsalatda tətbiq etmək üçün perspektivli innovasiya layihələrinin təqdimatını keçirəcək, enerjiyə qənaət edən sutəmizləyici texnologiya, kompyuter nitq texnologiyaları, tibbi informasiya texnologiyaları və sistemləri, seleksiyanın biotexnoloji və molekulyar-genetik metodları, molekulyar biologiya diaqnostikası, lazer-optik və optik-elektron texnologiyalar və digər sahələrdə qarşılıqlı əlaqələri genişləndirmək istiqamətində konkret məsələlər müzakirə olunacaqdır.