Bakıda Beynəlxalq Vergi və İnvestisiya Mərkəzinin (İTİC) vergi ekspertlərinin 7-ci illik Avrasiya seminarı öz işinə başlamışdır. Seminarda beynəlxalq miqyasda vergi siyasəti və vergi inzibatçılığına məsul olan şəxslər, dövlət və hökumət rəsmləri, investorlar, müstəqil vergi ekspertləri iştirak edirlər.
Tədbir İTİC-in "insanları və resursları birləşdirmə" missiyasına uyğun həyata keçirilir. Əvvəlki illərdə seminarlar Asiya və Avropanın aparıcı ölkələrinin paytaxtlarında -Paris, Sinqapur, Dubay, Moskva və Astanada təşkil olunmuşdur. Bu cür regional tədbirlər əsasən vergi məsələləri ilə əlaqədar fəaliyyət göstərən dövlət və hökumət nümayəndələri, həmçinin müstəqil ekspertlər arasında fikir mümadiləsi aparmaq baxımından əhəmiyyətlidir.
Seminarda vergi siyasətinə dair müxtəlif məsələlər, xüsusilə investorların dövlətdəki maraqlarının balanslaşdırılması üçün həyata keçirilən vergi siyasəti , vergi auditi və mübahisələrin həllində inkişaf məsələləri, maliyyə sahəsində regional strukturların fəaliyyəti və s.müzakirəsi nəzərdə tutulmuşdur.
Tədbirdə Avrasiya İqtisadi Birliyinin, Avropadaxili Vergi Administrasiyaları Təşkilatının, Rusiya, Ukrayna, Qazaxıstan, Gürcüstan və Türkmənistanın nümayəndə heyətləri, Azərbaycanın dövlət və hökumət nümayəndələri, müstəqil auditor təşkilatlarının təmsilçiləri iştirak edirlər.