Mayın 24-də İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan və Niderland iş adamları arasında işgüzar görüş keçirilmişdir.  
Tədbirdə Azərbaycan və Niderland tərəfdən rəsmi şəxslərlə yanaşı, kənd təsərrüfatı və qida sənayesi sahələrini təmsil edən 80-ə yaxın sahibkar iştirak etmişdir.
AZPROMO-nun prezidenti Adil Məmmədov ölkəmizdəki biznes və investisiya imkanları barədə məlumat vermişdir. Bildirmişdir ki, Azərbaycanın kənd təsərrüfatı və ərzaq sənayesi sektorlarına sərmayə qoyuluşu üçün böyük imkanlar var və niderlandlı iş adamları bu imkanlardan geniş şəkildə yararlana bilərlər.
Sonra Niderland Krallığının İqtisadiyyat, Kənd Təsərrüfatı və İnnovasiyalar Nazirliyinin təmsilçisi Krijin Poppe çıxış etmişdir.
Azərbaycan İnvestisiya Şirkətinin icraçı direktoru Əfqan İsayev təmsil etdiyi qurumun fəaliyyəti və həyata keçirilən layihələr, Niderland ticarət missiyasının rəhbəri, "The Friesian" süd məhsulları istehsalı şirkətinin baş direktoru Sibren Van der Zvaaq isə missiyanın məqsədi və nümayəndə heyətindəki sahibkarlar barədə məlumat vermişlər.
Tədbir iş adamları arasında mövcud iqtisadi əlaqələrin və əməkdaşlıq perspektivlərinin müzakirə edildiyi ikitərəfli görüşlərlə davam etmişdir.