Bu ilin dörd ayı ərzində ticarət şəbəkələrindən əhaliyə 4,9 milyard manat məbləğində və ya 2010-cu ilin eyni dövrü ilə müqayisədə 8,3 faiz çox istehlak malları satılmışdır. İstehlak mallarının 4,8 milyard manatı pərakəndə ticarət, 146,2 milyon manatı iaşə şəbəkələrində realizə olunmuşdur. Əhalinin ticarət şəbəkələrində xərclədikləri vəsaitin 3,1 milyard manatı ərzaq məhsullarının, 1,8 milyard manatı isə qeyri-ərzaq mallarının alınmasına sərf olunmuşdur.
Dörd ay ərzində xidmət şəbəkələri vasitəsilə əhaliyə 1,5 milyard manatlıq və ya əvvəlki ilin eyni dövrü ilə müqayisədə 9,4 faiz çox pullu xidmətlər göstərilmişdir.
Birinci rübdə ölkənin dövlət və qeyri-dövlət təşkilatları və ayrı-ayrı fiziki şəxsləri 114 xarici dövlətlə 7,3 milyard ABŞ dolları məbləğində ticarət əməliyyatları aparmışlar. Xarici tiarət dövriyyəsinin 5,4 milyard dollarını Azərbaycandan ixrac olunmuş mallar, 1,9 milyard dollarını ölkəmizə idxal edilmiş məhsullar təşkil etmişdir. Əvvəlki ilin yanvar-mart ayları ilə müqayisədə xarici ticarət dövriyyəsinin fiziki həcmi 16,4 faiz, o cümlədən idxal 60,4 faiz, ixrac isə 0,8 faiz artmış, rüb ərzində 3,5 milyard dollarlıq müsbət xarici ticarət saldosu yaranmışdır.
Xarici ticarət əməliyyatlarının beşdə dörd hissəsindən çoxu (84,9 faizi) İtaliya, Fransa, Rusiya Federasiyası, Amerika Birləşmiş Ştatları, Belarus, Malayziya, Ukrayna, Türkiyə, Bolqarıstan, İsrail, Almaniya, Çin, İspaniya, Gürcüstan və İndoneziya dövlətləri ilə aparılmışdır.

Telman ƏLİYEV, "Xalq qəzeti"