Bakı, 10 dekabr (AzərTAc). Dekabrın 10-da "Azercell Telekom" MMC-nin "Barama" layihə ofisinin açılışı olmuşdur.

İçərişəhərdə yerləşən müasir üslublu bu mərkəz zəruri avadanlıqla təmin edilmiş, eyni vaxtda təxminən 20 layihə iştirakçısının işləməsi üçün hər cür şərait yaradılmışdır.
Layihənin məqsədi gənclər tərəfindən irəli sürülən ideyaları tədqiq etmək, onların mükəmməl varianta gətirilməsinə, həm də həyata keçirilməsinə yardımçı olmaqdır.

"Barama" layihəsinin ofisi Azərbaycan Respublikası Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsinin dəstəyi ilə yaradılmışdır. Qoruq idarəsinin bu təşəbbüsü dəstəkləməkdə məqsədi İçərişəhərin timsalında "Keçmişdən-gələcəyə" konsepsiyasının həyata keçirilməsi və informasiya texnologiyalarının inkişaf etdirilməsinə kömək göstərməkdir.

Layihədə iştirak etmək istəyənlər www.azercell.com/barama internet səhifəsində yerləşdirilən anket-ərizəni dolduraraq, orada göstərilən əlavə sənədlərlə yanaşı öz ideyalarını "Azercell"ə göndərə bilərlər. Ərizələr davamlı olaraq qəbul edilir. Təklif olunan ideyalar müəyyən dəyərləri, yaradıcılıq, yenilik, sosial-iqtisadi faydalar və s. kimi xüsusiyyətləri özündə əks etdirməlidir.