Mayın 5-dən 7-dək İstanbulda XIII Avrasiya iqtisadi zirvə toplantısı keçiriləcəkdir.
Türkiyənin Mərmərə Qrupu Strateji və Sosial Araşdırmalar Vəqfinin təşkilatçılığı ilə keçirilən zirvə toplantısında Azərbaycanı Prezident Administrasiyası ictimai-siyasi məsələlər şöbəsinin müdiri Əli Həsənovdan, hökumət və parlament üzvlərindən ibarət geniş tərkibdə nüfuzlu nümayəndə heyəti təmsil edəcəkdir.
Dünyanın 40 ölkəsindən yüksək vəzifəli dövlət və hökumət rəsmilərinin, beynəlxalq təşkilatların, parlament üzvlərinin və mətbuat nümayəndələrinin qatılacağı sammitdə enerji təhlükəsizliyi, iqtisadiyyat, işsizlik, turizm, mədəniyyətlərarası dialoq məsələləri müzakirə ediləcək, Qafqaz, Orta Şərq və Orta Asiyada baş verən proseslər, qlobal maliyyə böhranının aradan qaldırılması istiqamətində əməkdaşlığın perspektivləri nəzərdən keçiriləcəkdir.
Mərmərə Qrupu Strateji və Sosial Araşdırmalar Vəqfinin idarə heyətinin sədri Akkan Suver demişdir ki, Azərbaycan 13 ildir ki, zirvə görüşündə iştirakı ilə bu sammitə zənginlik və ahəngdarlıq gətirir. Bu, ümummilli lider Heydər Əliyevin "bir millət, iki dövlət" fəlsəfəsinin həyatda ən gözəl təcəssümüdür.
AzərTAc{nl}