Azərbaycan Dövlət Neft Şirkətindən (ARDNŞ) "APA-ECONOMICS"ə verilən məlumata görə, mayın 1-də günorta saatlarında Şirkətin "Azneft" İstehsalat Birliyi Yeraltı Qaz Anbarları İdarəsinin "Qalmaz" sahəsində qəza baş verib. 
Hadisə "Qalmaz" yeraltı qazsaxlama anbarında aparılan genişləndirmə işləri zamanı baş verib. Burada köhnə işlək seperatorların yenisi ilə əvəz edilərək ləğvetmə işləri aparılarkən seperator qurğusunun daxili konstruksiyasında olan nasazlıqdan partlayış baş verib. Hadisə nəticəsində bu sahədə çalışan "Neftqaztikinti" Trestinin 5 saylı İnşaat-Quraşdırma İdarəsinin briqadiri Arif Bəşirov həlak olub, quraşdırıcı Vaqif Şəfiyev yaralanıb. Hadisənin başvermə səbəblərinin araşdırılması məqsədi ilə komissiya təşkil edilib, təhqiqat aparılır.