Azərbaycanın bərpa olunan enerji sahəsində çox böyük potensialı vardır. 
Avropa İttifaqının ölkəmizdəki nümayəndəliyinin rəhbəri, səfir Roland Kobia Avropa ilə Azərbaycanın münasibətlərində enerjinin çox mühüm əhəmiyyətə malik olduğunu diqqətə çatdırmışdır. Bərpa olunan enerji və enerji səmərəliliyi mühüm məsələlərdir ki, biz bunları getdikcə daha çox müzakirə etməliyik.
"Azərbaycanda dayanıqlı enerjinin inkişaf etdirilməsinə dəstək" layihəsinə münasibətini bildirən R.Kobia demişdir ki, beynəlxalq təşkilatlar bərpa olunan enerji mənbələrinin yaradılmasında Azərbaycanın cəhdlərini dəstəkləyir və yardımlarını əsirgəmirlər. Azərbaycan elə bir yola qədəm qoymuşdur ki, bu, öncə Azərbaycanın özü üçün çox önəmlidir. Amma, eyni zamanda, beynəlxalq təşkilatlar və digər dövlətlər də bunu dəstəkləyir.
Azərbaycan ənənəvi olaraq neft ölkəsi olmuşdur və bu sahədə qədim tarixə malikdir. Bir əsrdən çoxdur ki, Azərbaycan neft istehsalı üzrə dünyada çox böyük irəliləyişlər əldə etmişdir. Ancaq mən hesab edirəm ki, növbəti addım bərpa olunan enerji sahəsində olmalıdır. Bu, çox mühüm və çətin bir prosesdir. Siyasi arzu və iradənin, xüsusilə də maliyyə vəsaitinin tələb olunması heç də asan iş deyildir. Ancaq bu sahə ehtiyac duyulan sahədir.
Qeyd edək ki, "Azərbaycanda dayanıqlı enerjinin inkişaf etdirilməsinə dəstək" layihəsi Avropa İttifaqı və BMT-nin İnkişaf Proqramı vasitəsilə Norveç hökuməti tərəfindən maliyyələşdirilir.

AzərTAc