İyunun 3-də Bakıda ABŞ-Azərbaycan Ticarət Palatasının (USACC) təşkilatçılığı ilə "Amerika və Azərbaycan üçün biznes imkanları" biznes və sərmayə konfransı keçiriləcəkdir. Bu barədə USACC-in Vaşinqtondakı baş qərargahından bildirmişlər. 
Bakıda keçiriləcək birgünlük konfrans Birləşmiş Ştatların və Azərbaycanın tanınmış biznes liderlərini, iş adamlarını bir araya gətirərək iki ölkə arasında yeni biznes və ticarət əlaqələrinin genişləndirilməsində konkret layihələrə həsr olunacaqdır. USACC-nin icraçı direktoru Mahir İsgəndər demişdir ki, Azərbaycanın son illər iqtisadi artımının yenilməz sürəti ölkəni ABŞ iş adamları üçün cəlbedici sərmayə qoyuluşu məkanına çevirmişdir. Dünya maliyyə böhranı yaşadığı bir dövrdə, ölkəmizin təkcə qeyri-neft sektorunda nümayiş etdirdiyi artım 5,9 faiz təşkil etmişdir. İxracın ümumi məbləği 21 milyard, idxalın məbləği isə 6,6 milyard ABŞ dollarını ötmüşdür. M.İsgəndərin sözlərinə görə, Azərbaycanın iqtisadi tarixində olduqca maraqlı bir məqamda konkret nəticələrə gətirib çıxaran konfransın keçirilməsinə zərurət duyulur. USACC bu baxımdan real biznes əlaqələrinin və yeni tərəfdaşlığın qurulmasına yardım etmək niyyəti ilə təşkil etdiyi konfransda altı müzakirə sessiyasını Azərbaycanın turizm, informasiya texnologiyaları və telekommunikasiya, nəqliyyat, inşaat və digər sahələrində sərmayə imkanları, buraya Amerika kapitalının gətirilməsi, Azərbaycanın yeni enerji reallıqları, dünya şöhrətli biznes şəbəkələrinin Azərbaycanda açılması kimi mövzulara həsr edəcəkdir. "Hyatt Regency" mehmanxanasında keçiriləcək konfrans Azərbaycan Beynəlxalq Bankı, "Azercell", "Şevron" və "bp" şirkətlərinin sponsorluğu ilə təşkil olunacaqdır.

Şəfəq AKİFQIZI AzərTAc-ın xüsusi müxbiri
Vaşinqton