Rabitə və İnformasiya Texnologiyaları Nazirliyi ilə Heydər Əliyev Fondunun dəstəyi və sifarişi əsasında Azərbaycanın "NeyroTex" şirkəti tərəfindən kor və görmə qabiliyyəti zəif olan insanlar üçün dünyada ilk dəfə olaraq səslə idarə edilən minikompyuterin sınaq nümunələri hazırlanmışdır. 
Görkəmli oftalmoloq alim, akademik Zərifə Əliyevanın doğum günü ərəfəsində ictimaiyyətə təqdim olunan yeni minikompyuteri yaratmaqda məqsəd kor və görmə qabiliyyəti zəif olan insanlara informasiya və kommunikasiya texnologiyalarından bərabər hüquqlu istifadəni təmin etməkdir.
Nazirlikdən bildirmişlər ki, yeni minikompyuterin digərlərindən fərqi monitorun və klaviaturanın olmaması və bütün əmrlərin mikrofon vasitəsilə icra olunmasıdır. Belə ki, səsli əmrlər vasitəsilə, onlayn rejimdə son yeniliklərlə tanış olmaq, elektron poçtdan istifadə etmək, elektron mətnləri səsləndirmək, bundan əlavə, telefon zənglərini qəbul etmək və onları cavablandırmaq kimi imkanlarla təchiz olunmuşdur.
Kompyuterdə proqram təminatı və bütün əmrlər Azərbaycan dilindədir. Gələcəkdə nitqin kompyuter vasitəsilə rus və ingilis dilinə də tərcüməsi nəzərdə tutulmuşdur.

AzərTAc