Hollandiyanın nüfuzlu "beyin mərkəzi" olan "Clingendael"in Enerji Proqramının direktoru Lusiya Van Geuns və baş elmi işçisi Kristof Van Aqt Azərbaycan Respublikasının Prezidenti yanında Strateji Araşdırmalar Mərkəzində (SAM) olmuşlar.
SAM-dan bildirmişlər ki, qonaqlara mərkəzin fəaliyyəti haqqında ətraflı məlumat verilmişdir.
Hollandiyalı ekspertlər "Xəzər neft-qaz" adlı hesabatın üzərində çalışdıqlarını və bu məsələ ilə bağlı azərbaycanlı həmkarlarının fikirləri ilə maraqlandıqlarını qeyd etmişlər. Qonaqlar araşdırmanın yekunu olaraq cari ilin payızında Hollandiyada eyni adlı beynəlxalq konfransın keçiriləcəyini bildirmişlər.
Görüşdə həmçinin iki ölkənin "beyin mərkəzləri" arasında əməkdaşlığın inkişaf etdirilməsinin və elmi-tədqiqat sahəsində müxtəlif layihələrin həyata keçirilməsinin vacibliyi vurğulanmışdır.
Bundan əlavə, Azərbaycanın Avropanın enerji təhlükəsizliyində oynadığı rolu, həll olunmamış münaqişələrin qlobal təhlükəsizliyə təsiri, Xəzər və Cənubi Qafqaz regionlarının müasir geosiyasəti, regional enerji layihələri, yeni sərmayələrin yatırılması və digər məsələlər müzakirələr edilmişdir.