Azərbaycanın maliyyə naziri Samir Şərifov Bakıda səfərdə olan Qara Dəniz Ticarət və İnkişaf Bankının (QDTİB) prezidenti Andrey Kondakovun başçılıq etdiyi nümayəndə heyəti ilə görüşmüşdür.
Görüşdə bankla Azərbaycan Respublikası arasında hazırkı əlaqələr, o cümlədən gələcək əməkdaşlıq istiqamətləri üzrə fikir mübadiləsi aparılmışdır.
Təmsil etdiyi qurumun fəaliyyəti barədə ətraflı məlumat verən A.Kondakov bankın Azərbaycanda 14 layihəni maliyyələşdirdiyini diqqətə çatdırmışdır: "QDTİB-nin Azərbaycanda fəaliyyətinin genişləndirilməsi və yeni maraqlı layihələrin maliyyələşdirilməsi qarşıda duran əsas vəzifələrdəndir",-deyən A.Kondakov əməkdaşlıqdan məmnunluq duyduğunu vurğulamışdır.
S.Şərifov Azərbaycanın beynəlxalq maliyyə institutları, o cümlədən Qara Dəniz Ticarət və İnkişaf Bankı ilə əməkdaşlığa böyük əhəmiyyət verdiyini qeyd etmişdir. Son illərdə ölkə iqtisadiyyatının sürətlə inkişaf etdiyini vurğulayan nazir bildirmişdir ki, bu inkişaf beynəlxalq kredit reytinq agentlikləri tərəfindən yüksək qiymətləndirilir.
Görüşdə bankın Azərbaycan üzrə 2011-2014-cü illəri əhatə edəcək stategiyası da müzakirə edilmiş, prioritetlərin dəqiqləşdirilməsi və onların ölkənin sosial-iqtisadi siyasətinə uyğunlaşdırılması ilə bağlı fikir mübadiləsi aparılmışdır. Stategiyada xüsusilə qeyri-neft sektorunun, o cümlədən kənd təsərrüfatının inkişafının proritet kimi nəzərə alınmasının vacibliyi vurğulanmışdır.
1996-cı ildə təsis edilən Qara Dəniz Ticarət və İnkişaf Bankının kapitalında Azərbaycanın payı 5 faiz təşkil edir. 11 illik fəaliyyəti dövründə bank Azərbaycanda dəyəri 100 milyon avro olan 14 layihəni maliyyələşdirmişdir.

AzərTAc