"Az-Granata" Ağsu şirə və şərab emalı zavodunun əməkdaşları 14 may - 8 iyun tarixlərində AMEA-nın Mikrobiologiya İnstitutunun Mikrobioloji biotexnologiya laboratoriyasında elmi-praktiki təcrübə keçiblər.

www.science.gov.az saytı xəbər verir ki, elm və istehsalat arasında əlaqələrin gücləndirilməsi məqsədilə keçirilən məşğələləri institutun elmi işlər üzrə direktor müavini, AMEA-nın müxbir üzvü Pənah Muradov və laboratoriyanın müdiri, biologiya üzrə elmlər doktoru Könül Baxşəliyeva aparıblar.

Təlimlərdə zavodun əməkdaşları şirə və şərab istehsalı zamanı tələb olunan mikrobioloji analizlərin aparılması, bakteriya və göbələklərin müəyyənləşdirilməsi, identifikasiyası, eləcə də mikrobioloji təhlükəsizliyin təmin edilməsi üçün lazımi metod və yanaşmalarla tanış olublar.

Sonda zavod əməkdaşlarına müvafiq sertifikatlar verilib.

Əlipənah BAYRAMOV,
“Xalq qəzeti”