Mayın 24-də Sankt–Peterburqda 22-ci Peterburq Beynəlxalq İqtisadi Forumu (PBİF) açılıb. Forumun işində AZƏRTAC da iştirak edib.

PBİF dünyanın aparıcı siyasətçi və biznesmenlərini birləşdirir. Onlar Rusiyanın, inkişaf etməkdə olan bazarların və dünya birliyinin qarşısında duran mühüm problemləri müəyyənləşdirmək və müzakirə etmək, həll variantlarının axtarışına zəruri qüvvələri cəlb etmək üçün görüşürlər.

Rusiyanın TASS agentliyi tərəfindən təşkil olunmuş “dəyirmi masa”da AZƏRTAC-ı Asiya-Sakit Okean regionu ölkələrinin İnformasiya Agentlikləri Təşkilatının (OANA) baş katibi Vüqar Seyidov təmsil edib. Xəbər agentliklərinin yeni minillikdə üzləşdiyi yeni çağırışlara həsr edilmiş bu “dəyirmi masa” maraqlı və canlı diskussiyaya çevrilib. Bir sıra nüfuzlu informasiya agentliklərinin nümayəndələri diskussiyada fəal iştirak edib, öz fikirlərini bildiriblər.