Dünya Bankı və Beynəlxalq Valyuta Fondu Azərbaycan ilə əməkdaşlıqdan məmnundurlar.
Bu fikir Azərbaycanın Mərkəzi Bankının sədri Elman Rüstəmovun Dünya Bankının (DB) icraçı direktoru Mişel Mordasini və Beynəlxalq Valyuta Fondunun (BVF) icraçı direktoru Rene Verber ilə Vaşinqtonda keçirilmiş görüşündə səslənmişdir.
Görüşdə Azərbaycanın iqtisadi vəziyyəti barədə məlumat verən E.Rüstəmov bildirmişdir ki, ölkəmiz iqtisadi artım tempinə görə dünya liderlərindən biridir.
Öz növbəsində M.Mordasini və R.Verber də təmsil etdikləri beynəlxalq qurumların Azərbaycan ilə münasibətlərin yüksək səviyyədə olmasından məmnunluqlarını ifadə etmişlər.
Görüşdə özəl sektorun inkişafı sahəsində görülən işlərə də toxunulmuşdur. Qeyd olunmuşdur ki, islahatların davam etdirilməsi və prosedurların asanlaşdırılması istiqamətində hələ çox işlər görülməlidir. Həmçinin, Mərkəzi Bank ilə DB və BVF arasında gələcək qarşılıqlı əməkdaşlıq məsələləri də müzakirə olunmuşdur.
Sonda E.Rüstəmov hər iki beynəlxalq qurumun icraçı direktorlarına Azərbaycan mədəniyyətini əks etdirən xatirə hədiyyələri təqdim etmişdir.
***
Səfər çərçivəsində E.Rüstəmov DB-nin Avropa və Mərkəzi Asiya üzrə əməliyyatlar direktoru Teodor Ahlers, eləcə də DB-nin Cənubi Qafqaz regionu üzrə direktoru Əsəd Aləmlə də görüşmüşdür.
Əsəd Aləm bildirmişdir ki, kapital bazarlarının müasirləşdirilməsi və Azərbaycanın suvarma sistemlərinə dair layihələr aprelin 17-də Direktorlar Şurasında müzakirəyə çıxarılacaqdır.