Dünya Bankının (DB) Vaşinqtondakı baş ofisində keçirilən "Azərbaycan günləri" çərçivəsində Mərkəzi Bankın sədri Elman Rüstəmov Dünya Bankının prezidenti Robert Zoellik ilə görüşmüşdür.
Görüşdə DB ilə Azərbaycan arasındakı əməkdaşlığın inkişaf tarixi, əldə olunan nailiyyətlər və perspektivlərə dair geniş fikir mübadiləsi aparılmış, ölkə üzrə yeni iqtisadi inkişaf strategiyasının müxtəlif istiqamətləri müzakirə edilmişdir.
E.Rüstəmov bildirmişdir ki, DB Azərbaycanda bazar iqtisadiyyatının qurulması, yoxsulluğun azaldılması, iqtisadi artım üçün əsasların və modern infrastrukturun yaradılması, makroiqtisadi idarəetmənin təkmilləşdirilməsi, səhiyyə, maliyyə sistemlərində aparılan islahatlarda ölkəmizə dəstək olmuşdur.
Söhbət zamanı Azərbaycan və Dünya Bankının birgə həyata keçirdiyi layihələrə də toxunulmuşdur. Qeyd edilmişdir ki, hazırda DB yeni - təhsil sahəsində strateji islahatlar layihəsi üzərində fəal işləyir ki, bu da ölkəmiz üçün prioritet sahələrdəndir. "Biz hesab edirik ki, bu layihə təhsilin bütün səviyyələrini əhatə etməli və sistemli xarakter daşımalıdır", - deyə E.Rüstəmov bildirmişdir.
Görüşdə, həmçinin biznes mühiti və yeni strateji əməkdaşlığın istiqaməti kimi qarşılıqlı intellektual mübadilənin zəruriliyi barəsində də fikir mübadiləsi aparılmışdır.