Son illərdə Azərbaycanda kənd təsərrüfatının inkişafı, xüsusilə ərzaq təhlükəsizliyinin təmin edilməsi sahəsində böyük uğurlar əldə edilib. Sovet rejimi dövründə Azərbaycanda əsasən pambıq, üzüm, meyvə-tərəvəz istehsal olunurdu. Digər əsas ərzaq məhsulları isə başqa respublikalardan gətirilirdi. Müstəqillik illərində daxili tələbatın yerli məhsullar hesabına təmin edilməsi əsas vəzifə kimi qarşıya qoyuldu. Bu istiqamətdə həyata keçirilən tədbirlər və aqrar sahəyə dövlətin fəal dəstəyi  tezliklə öz bəhrəsini verdi.

Bu barədə Bərdədə keçirilən pambıqçılığın inkişafına dair respublika müşavirəsində danışılıb. Ölkə Prezidenti İlham Əliyev deyib:”Bu gün biz ərzaq təhlükəsizliyini şərtləndirən əsas sahələr üzrə ya özümüzü tam təmin edirik, ya da ki, bu hədəfə çox yaxınıq. Ət istehsalı təxminən 100 faizə yaxındır, Azərbaycan özünü təmin edir. Süd istehsalı təqribən 80-85 faizdir. Toyuq əti istehsalı yaxın bir-iki ilə 100 faizə çatacaq və böyük ixrac potensialı yaradılacaq. Yumurta istehsalı - biz indi nəinki özümüzü təmin edirik, həm də ixrac edirik.”

                                      Ə. Bayramov,
“Xalq qəzeti”