Dövlət Statistika Komitəsi tərəfindən təşkil olunmuş statistik müşahidənin nəticələrinə görə, 2017-ci ildə 21165 təsərrüfatda mövcud olan 271,7 min arı ailəsindən 3043,1 ton bal, 90,2 ton mum, 11,2 ton bərəmum, 8,1 ton güləm və 281,7 kiloqram arı südü əldə edilmişdir.

Balın bir kiloqramının orta satış qiyməti 23,7, mumun orta satış qiyməti 11,5, bərəmumun orta satış qiyməti 116,7, güləmin orta satış qiyməti 56,7, arı südünün 1 qramının orta satış qiyməti 4,9 manat olmuşdur. 2017-ci ildə 5 ölkəyə 54,8 min ABŞ dolları dəyərində 6,5 ton bal ixrac edilmişdir ki, onun da 93,8 faizi Yaponiyanın payına düşür.

Ümumiyyətlə, “Arıçılıq haqqında” qanunun qəbul edildiyi dövrdən sonrakı 9 ildə arı ailələrinin sayı 1,9, arıçılıqla məşğul olan təsərrüfatlarda bir təsərrüfata düşən arı ailələrinin sayı 11,1-12,8, bal istehsalı 2,2 dəfə artmışdır.

Müşahidə zamanı arıçılıq təsərrüfatları bu sahənin daha da inkişaf etdirilməsi üçün dövlət tərəfindən güzəştli kreditlərin ayrılması, arıçılıq üzrə damazlıq təsərrüfatlarının yaradılması, bal satışı yarmarkalarının mütəmadi keçirilməsi, qablaşdırılmış və satışa çıxarılmış arıçılıq məhsullarının keyfiyyətinin yoxlanılması kimi təkliflər irəli sürülmüşdür.

Vaqif BAYRAMOV,
“Xalq qəzeti”