Beynəlxalq ekoloqlar birliyi insan təsirinin (antropogen) həlledici rol oynadığı qlobal iqlim dəyişmələrindən daha çox zərər çəkmiş məməli heyvan və quş növlərinin sayını nəzərdən keçirib. Bu barədə “Lenta.ru” saytı məlumat yayıb.

Ekoloqlar bildirirlər ki, hazırda quruda yaşayan, uçmayan məməli heyvan növlərinin (nəsli kəsilməkdə olan 873 növdən) 47 faizinin və quşların (nəsli kəsilməkdə olan 1272 növdən) 23,4 faizinin artıq qlobal iqlim dəyişmələrindən zərər çəkdiyini hesab etməyə ciddi əsaslar var. Bunu nəzərə alan alimlər həyəcan təbili çalırlar.

Mütəxəssislər bildirirlər ki, bu heyvan növlərinin çoxu Avropa və Şimali Amerikada yaşayır. Ekoloqlar təhlil üçün yetərli məlumatı məhz həmin ərazilər üzrə toplayıblar.

Alimlər biomüxtəlifliyin azalması və qlobal istiləşmə arasında əlaqə haqqında tədqiqat apararaq bu qənaətə gəliblər.

Yeri gəlmişkən, mütəxəssislər dünyanın aparıcı beynəlxalq təşkilatlarını və ictimai təsirə malik iş adamlarını biomüxtəlifliyin problemlərinə diqqət yetirməyə və adıçəkilən növlərin qorunması üçün tədbirlər görməyə çağırıblar.

Əfsanə MƏHƏMMƏDLİ,
“Xalq qəzeti”