Ekologiya və Təbii Sərvətlər Nazirliyi Milli Hidrometeorologiya Departamentindən aldığımız məlumata görə, mart ayında hava şəraitində tez-tez dəyişiklik müşahidə olunacaq. Ümumi temperatur rejiminin dəyişkən olmasına baxmayaraq, mart ayında havanın orta aylıq temperaturunun iqlim normasına yaxın, bəzi günlərdə isə bir qədər yüksək olacağı gözlənilir.

Aylıq yağıntının miqdarının iqlim normasına yaxın, bəzi ərazilərdə isə iqlim normasından bir qədər yüksək olacağı ehtimal olunur.

Sinoptiklərin verdikləri proqnoza əsasən, mart ayında Bakıda və Abşeron yarımadasında havanın orta aylıq temperaturunun 5-8 dərəcə isti olacağı gözlənilir ki, bu da iqlim normasına yaxın və 1 dərəcə yüksəkdir. Gecələr 4-9 dərəcə isti, bəzi günlərdə 0-2 dərəcə şaxta təşkil edəcək. Gündüzlər 10-15 dərəcə isti, bəzi günlərdə 19-24 dərəcəyədək yüksələcəyi gözlənilir.

Aylıq yağıntının miqdarının iqlim normasına yaxın ( norma 20-27 mm ), bəzi yerlərdə isə bir qədər çox olacağı ehtimal edilir.

Qəzənfər  QASIMOV,
"Xalq  qəzeti"