Əlillərə və sağlamlıq imkanları məhdud uşaqlara bərpa-müalicə xidməti göstərən müəssisələrdə xidmət səviyyəsinin yüksəldilməsi, belə müəssisələrdə müasir tələblərə cavab verən şəraitin yaradılması Əmək və Əhalinin Sosial Müdafiəsi Nazirliyinin fəaliyyətinin əsas prioritetlərindən biridir.

Bu məqsədlə yaxın vaxtlarda nazirliyin Sumqayıt, Yevlax, Naftalan şəhərlərindəki Əlillərin Regional Bərpa Mərkəzlərində, habelə Bakı şəhər Uşaq Bərpa Mərkəzində və Mərdəkan Müalicə Pansionatında əsaslı təmirə başlanılacaqdır. İşlər başa çatdırıldıqdan sonra həmin müəssisələrin müasir tibbi-reabilitasiya avadanlıqları ilə təchizatı həyata keçiriləcəkdir. Eyni zamanda, nazirliyin tabeliyindəki belə mərkəzlərdə tibbi bərpa ilə yanaşı, beynəlxalq təcrübə əsasında əlillərə və sağlamlıq imkanları məhdud uşaqlara sosial reabilitasiya yönümlü xidmətlərin göstərilməsi də nəzərdə tutulur.

Qeyd etmək lazımdır ki, hazırda nazirliyin Bakı Protez-Ortopedik Bərpa Mərkəzində və Respublika Əlillərin Bərpa Mərkəzində əsaslı təmir işləri aparılır və yaxın aylarda bu mərkəzlər yüksək səviyyədə yenidən qurularaq istifadəyə veriləcəkdir.

Z.BƏŞİRQIZI,

“Xalq qəzeti”