Ermənilər işğal altındakı Azərbaycan ərazilərində çayları zəhərli maddələrlə çirkləndirdiklərini etiraf etmişlər.

APA-nın məlumatına görə, Ermənistanda nəşr olunan “Lragir” qəzeti yazır ki, jurnalist Armine Narinyan “Facebook” sosial şəbəkəsində Sərsəng su anbarında balıqların kütləvi surətdə qırılması barədə xəbər yaymışdır.

Balıqların məhv olmasının əsas səbəbi Qarabağda faydalı qazıntıları istismar edən “Beytz Metal” (Base Metals) şirkətinin (“Valleks” şirkətlər qrupu) Drımbon yatağında qızıl-mis emalı zamanı sianidləri çaya axıtmasıdır. Ətraf kəndlərdə yaşayan yerli əhali də faktı təsdiq etmişdir.

 Məlumatda həmçinin bildirilir ki, “Beytz Metal” şirkətinin direktoru artıq Drımbon yatağında ehtiyatların tükənmək üzrə olduğunu bəyan etmişdir. Şirkət 2015-ci ildə Ağdərədəki Caxkaşen adlı başqa bir yataqda işlərə başlamağı planlaşdırır.

 Qeyd edək ki, Sərsəng su anbarına toplanan su buradan Tərtər çayı vasitəsi ilə Kür çayına axır.