Azərbaycan Respublikası Prezidentinin Fərmanı

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

Azərbaycan Respublikası Prezidentinin 2002-ci il 24 avqust tarixli 769 nömrəli Fərmanı (Azərbaycan Respublikasının Qanunvericilik Toplusu, 2002, № 8, maddə 489; 2004, № 8, maddə 616; 2005, № 1, maddələr 15, 19; 2006, № 9, maddə 743; 2008, № 7, maddələr 612, 619, № 8, maddə 719; 2009, № 4, maddə 226; 2014, № 10, maddə 1213) ilə təsdiq edilmiş “Xidməti və mülki silahın Azərbaycan Respublikasına gətirilməsi və Azərbaycan Respublikasından aparılması Qaydaları”nda aşağıdakı dəyişikliklər edilsin:

1. 2-ci hissəyə aşağıdakı məzmunda üçüncü cümlə əlavə edilsin:

“Xidməti silah və onun döyüş sursatı Azərbaycan Respublikasına səfərləri zamanı xarici dövlət və hökumət başçılarını, onların ailə üzvlərini, beynəlxalq təşkilatların rəhbərlərini, habelə xarici dövlətlərin və beynəlxalq təşkilatların vəzifəli şəxslərini müşayiət edən həmin dövlətlərin və təşkilatların mühafizə xidmətlərinin əməkdaşları tərəfindən öz xidməti vəzifələrini icra etmək məqsədi ilə Azərbaycan Respublikasına gətirilə bilər.”.

2. 3-cü hissədə:

2.1. “döyüş sursatının” sözlərindən sonra “(bu Qaydaların 2-ci hissəsinin üçüncü cümləsində nəzərdə tutulmuş xidməti silah və onun döyüş sursatı istisna olmaqla)” sözləri əlavə edilsin;

2.2. aşağıdakı məzmunda ikinci və üçüncü cümlələr əlavə edilsin:

“Bu Qaydaların 2-ci hissəsinin üçüncü cümləsində nəzərdə tutulmuş xidməti silahın və onun döyüş sursatının Azərbaycan Respublikasına gətirilməsi və Azərbaycan Respublikasından aparılması Azərbaycan Respublikasının Xarici İşlər Nazirliyinin rəsmi müraciətinə əsasən Azərbaycan Respublikasının Xüsusi Dövlət Mühafizə Xidmətinin verdiyi xüsusi icazə ilə həyata keçirilir. Azərbaycan Respublikasının Xüsusi Dövlət Mühafizə Xidməti həmin xüsusi icazələr barədə DİN-ə məlumat verir.”.

3. 5-ci hissənin birinci cümləsinə “döyüş sursatının” sözlərindən sonra “(bu Qaydaların 2-ci hissəsinin üçüncü cümləsində nəzərdə tutulmuş xidməti silah və onun döyüş sursatı istisna olmaqla)” sözləri əlavə edilsin.

4. 7-ci hissədə “bəndində” sözü “hissəsində” sözü ilə əvəz edilsin.

5. 8.3-cü bəndin sonundakı nöqtə işarəsi nöqtəli vergül işarəsi ilə əvəz edilməklə aşağıdakı məzmunda 8.4-cü bənd əlavə edilsin:

“8.4. silah və onun döyüş sursatı Azərbaycan Respublikasının ərazisinə bu Qaydaların 2-ci hissəsinin üçüncü cümləsində nəzərdə tutulmuş məqsədlə gətirildikdə.”.

6. Azərbaycan Respublikasının Nazirlər Kabineti:

6.1. Azərbaycan Respublikası Prezidentinin aktlarının bu fərmana uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etsin;

6.2. Azərbaycan Respublikası Nazirlər Kabinetinin normativ hüquqi aktlarının üç ay müddətində bu fərmana uyğunlaşdırılmasını təmin edib Azərbaycan Respublikasının Prezidentinə məlumat versin;

6.3. mərkəzi icra hakimiyyəti orqanlarının normativ hüquqi aktlarının bu fərmana uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;

6.4. bu fərmandan irəli gələn digər məsələləri həll etsin.

7. Azərbaycan Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların bu fərmana uyğunlaşdırılmasını təmin edib Azərbaycan Respublikasının Nazirlər Kabinetinə məlumat versin.

İlham ƏLİYEV
Azərbaycan Respublikasının Prezidenti 

Bakı şəhəri, 9 sentyabr 2015-ci il