“Krım” Xəbər agentliyi Türkiyənin Ankara şəhərində fəaliyyət göstərən  “Azərbaycan Kültür Dərnəyi”nin fəaliyyətindən reportaj hazırlayıb. Reportajda dərnəyin qadın bölməsinin rəhbəri Nəsrin Askeran Ünal dərnəyin fəaliyyətindən, qadınların ictimai fəallığından söhbət açıb. Reportajda ailəsinin əslən Azərbaycanın Gəncə şəhərindən olduğunu  bildirən  Nəsrin Askeran Ünal 25 ilə yaxındır ki, dərnəkdə fəaliyyət göstərdiyini bildirib. “Dərnəyimizdə Azərbaycan tarixinə, mədəni irsi və ənənələrinə uyğun olaraq, fəaliyyətimizi gerçəkləşdiririk, Azərbaycan üçün önəmli günləri qeyd edirik”–deyib.

Təşkilat olaraq, qadınların ictimai fəallığına diqqət çəkən Nəsrin Askeran Ünal qeyd edib ki, Türkiyədəki və Azərbaycandakı qadın təşkilatları arasında körpü yaratmağa çalışıb.

Onun sözlərinə görə, təmsil etdiyi qurum Qarabağ həqiqətləri ilə bağlı Bakıda və Gəncədə bir sıra işlər görüblər. Türk dünyası Qadın Yazarlar Simpoziumu çərçivəsində Qarabağdan olan qadın yazarlar üçün  layihə həyata keçirdiklərini vurğuladı.  “Türk  torpaqlarında başlamış qadın hərəkatı  Krım Muxtar Cümhuriyyəti və Azərbaycan Xalq  Cümhuriyyətinin simasında gözəl  nəticəsini verdi. Krımda 5 millət vəkili vardı.”—deyə Ünal qadınların cəmiyyətə verə biləcəyi töhfələrdən danışıb.

Əfsanə BAYRAMQIZI,

 “Xalq qəzeti”