Azərbaycan Respublikasının Nazirlər Kabineti yanında Tərcümə Mərkəzinin, ölkə ədəbiyyatımızın  dünyada tanıdılması və təbliği istiqamətində həyata keçirdiyi beynəlxalq layihələrindən olan “Sirr” (Azərbaycan hekayələri) kitabı Almaniyada çap olunub. Kitab Almaniyanın “Hans-Yürgen Maurer” nəşriyyatında nəşr edilib. Məlumat  Tərcümə Mərkəzindən verilib. 

Müasir Azərbaycan ədəbiyyatının Cəlil Məmmədquluzadə, Mir Cəlal, İsa Hüseynov, Sabir Əhmədli, İsi Məlikzadə, Maqsud İbrahimbəyov, Yusif Səmədoğlu, Anar, Elçin, Mövlud Süleymanlı, Kamal Abdulla, Etimad Başkeçid, Orxan Fikrətoğlu kimi ədəbi simalarının hekayələri toplanmış kitab alman dilinə çevrilib. Kitabda toplanmış hekayələri  alman və avstriyalı tərcüməçilər – Luts Engel, Helqa Pabl, Sena Doqan, Hilda Tanik, Marion Kubin-Semyonova, Valtraut və Volfram Şröderlər  tərcümə ediblər.

Kitabın redaktoru Hans-Yürgen Maurer, “Ön söz”ün müəllifi Almaniyanın Vürtsburq Universitetinin professoru Ziqlinde Hartmandır.

Qeyd edək ki, kitabın  yaxın vaxtlarda Almaniya və Avstriya şəhərlərində təqdimatı keçiriləcək.

“Xalq qəzeti”