Ulu öndər Heydər Əliyevin  fevral ayının 2-nin - “Gənclər Günü” kimi qeyd olunması haqqında” sərəncamına, Prezident İlham Əliyevin
 2017-ci il 15 sentyabr tarixli sərəncamı ilə təsdiq edilmiş “Azərbaycan gəncliyi 2017-2021-ci illərdə” Dövlət Proqramına əsasən, Mədəniyyət və Turizm Nazirliyi tərəfindən 2-6 fevral 2018-ci il tarixində ənənəvi “Gəncliyin səsi” festivalı keçiriləcəkdir. Festival gənc istedadların üzə çıxarılması, onların yaradıcılıq axtarışlarının, bilik və bacarıqlarının, yaradıcılıq nailiyyətlərinin dəstəklənməsi, yeni simaların aşkar olunması məqsədi daşıyır.

2016-cı ildən etibarən sözügedən festival Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birlikdə keçirilir.

Bu il “Gəncliyin səsi” festivalının “ASAN könüllüləri” təşkilatı ilə birlikdə Bakı, Sumqayıt və Mingəçevir şəhərlərində, Şəmkir, Gədəbəy, Quba və Masallı rayonlarında keçirilməsi planlaşdırılır.

Eyni zamanda, festivalın açılış mərasimində istedadlı gənclərin mükafatlandırılması nəzərdə tutulmuşdur.

Festival çərçivəsində gənc yazarlar və rejissorlarla görüş rəsm sərgisi filmlərinin nümayişi, “ASAN könüllüləri”nin təqdimatında “Kölgə” və “Bankir adaxlı” tamaşalarının premyerası, gənc aşıqların konserti və sair tədbirlərin keçirilməsi nəzərdə tutulur.

M.MÜKƏRRƏMOĞLU,
“Xalq qəzeti”