ABŞ-ın Nyu-York şəhərində “Bronx World Cinema” festivalı keçirilib. Müəllif filmləri festivalında ölkəmizi rejissor Məzahir Həşimovun “Debüt” studiyasında lentə aldığı “Eliza” filmi təmsil edib.

Filmin bədii rəhbəri kinorejissor, Xalq artisti Eldar Quliyevdir. Ssenari müəllifi Yelena Andreyeva, operatoru Yuri Varnovski, rejissor assistenti Cabir Hacıyev, montajçı Elşən Bağırovdur. Ekran əsərində Dəniz Tacəddin, Toğrul Rza və Hicran Nəsirova rol alıblar.

...Filmin qəhrəmanı Elizanı bibisi böyüdüb. O, tərs qızdır və bu tərsliyi şəxsi həyatında da ona mane olur. Bütün bunlara dözə bilməyən bibisi Elizanın həyatına müdaxilə edir və onu bir gənclə tanış edir. Bundan sonra Eliza balaca televiziyada öz həyatını izləyir. Onun həyatı sanki bir çərçivəyə salınıb...

Bildirək ki, 2011-ci ildən fəaliyyətə başlayan “Bronx World Cinema” festivalı dünya kinosunun təbliğinə xidmət edir. Müxtəlif mədəniyyətləri bir arada nümayiş etdirmək festivalın əsas məqsədlərindən biridir.

M. MÜKƏRRƏMOĞLU,

“Xalq qəzeti”