Əminliklə deyə bilərik ki, bu gün respubilkamız və onun paytaxtı mədəniyyətlərarası, sivilizasiyalararası münasibətlərin qurulduğu məkana çevrilib. Ölkəmiz Şərqin və Qərbin ortaq dəyərlərini birləşdirən nadir multikulturalizm modelinə sahibdir. Bu modelin kökündə insanların sülh şəraitində yaşaması dayanır və dövlətlə din arasında mədəni münasibətlər mövcuddur, bütün dini azadlıqlar təmin edilib. Azərbaycanda dilindən, dinindən asılı olmayaraq, bütün xalqların nümayəndələri dostluq şəraitində yaşayırlar. Bu isə dünya mediasının diqqətindən yayınmır. Bu dəfə “Əl-Cəzirə” telekanalının ingilis dilindəki internet saytında Azərbaycanla bağlı növbəti məqalə yayılıb. Məqalənin müəllifi hazırda bu nüfuzlu media orqanında çalışan azərbaycanlı jurnalist Aysəba Umudludur.

Məqalədə Azərbaycandakı dini tolerantlıqdan, burada İslam dininin yayılması tarixindən, ölkəmizin İslam mədəniyyətinin inkişafına töhfələrindən geniş söhbət açılır. Məqalədə qeyd edilir ki, Azərbaycanda əhalinin 96 faizini müsəlmanlar təşkil edir. Digər sahələrdə olduğu kimi, dini sahədə də azadlıq təmin edilir. Ölkə Konstitusiyasına əsasən irqindən, etnik mənsubiyyətindən, dinindən, dilindən, cinsindən, mənşəyindən və s. asılı olmayaraq, hər kəsin hüquq və azadlıqlarının bərabər olduğu vurğulanır.

Ülviyyə VAHİDQIZI,
“Xalq qəzeti”