Qəbələ şəhərində keçrilən və  yanvarın 10-da  yekunlaşacaq XII Beynəlxalq “Veselo” Yumor və Musiqi Festivalı  əcnəbi iştirakçılara maraqlı anlar yaşadıb.  Əcnəbi iştirakçılar  üçün Azərbaycan mədəniyyəti gecəsi təşkil olunub. Heydər Əliyev Konqres Mərkəzində keçirilən tədbirdə  Azərbaycan və Ukrayna arasında mədəni və turizm əlaqələrinin əhəmiyyətindən bəhs edilib.

Əcnəbi turistlərə monitor vasitəsilə xalqımızın qədim tarixi, musiqi mədəniyyəti, milli mətbəxi və turizm imkanları  nümayiş olunub.  Mərkəzin foyesində istedadlı gənclərin əl işlərindən və rəsm əsərlərindən ibarət sərgi təşkil edilib.

Gecədə  musiqiçilərimiz  maraqlı proqramla çıxış ediblər. Nağaraçıların çıxışı, “Cəngi”, “İgidlər” rəqsi və “Azərbaycan” mahnısı gecəyə xüsusi rəng qatıb. Sonra əcnəbi qonaqlara  oteldə milli mətbəximizin ləziz yeməkləri təqdim olunub.

Ülviyyə VAHİDQIZI,

“Xalq qəzeti”