Xalça Muzeyində “Azərbaycanın ilk malakofauna muzeyi “Rinay”: Dünya okeanlarının inciləri” sərgisinin açılışı olub. Açılış mərasimində Azərbaycan Xalça Muzeyinin direktoru Şirin Məlikova bildirib ki, sərgi iştirakçılarına okeanların dibindən çıxarılan və bütün qitələri təmsil edən unikal bir malakofauna kolleksiyası təqdim olunur. İnsanlarda maraq doğuran kolleksiya 40 ildən çox vaxt ərzində toplanıb və Azərbaycanda “Rinay” adlı ilk şəxsi muzeydə saxlanılır.

Ş. Məlikova qonaqların nəzərinə çatdırıb ki, 3 minə yaxın eksponatı olan bu zəngin kolleksiya ömrünün böyük hissəsini bu işə həsr edən geoloq-alim, professor Tofiq Karayev tərəfindən yığılır, tədqiq olunur və saxlanılır. Bu kolleksiya dünyanın müxtəlif ölkələrində sərgilənir və mütəxəssislər tərəfindən yüksək qiymətləndirilir.

Tədbirdə çıxış edən mədəniyyət və turizm nazirinin müavini Sevda Məmmədəliyeva isə vurğulayıb ki, Tofiq Karayevin yaratdığı muzey ölkəmizdə bu profilli yeganə muzey olub öz orijinallığı ilə seçilir.

Tofiq Karayev “Rinay” muzeyinin fəaliyyəti haqqında danışıb. O, sərginin təşkilinə görə Mədəniyyət və Turizm Nazirliyinə və Azərbaycan Xalça Muzeyinə təşəkkür edib.

Qeyd edək ki, “Rinay” Azərbaycanda yaradılan və dünyada analoqu olmayan şəxsi muzey sayılır.

Sərgi yanvarın 4-dək nümayiş olunacaq.

Ülviyyə VAHİDQIZI,
“Xalq qəzeti”