Azərbaycan Respublikasının Mədəniyyət və Turizm Nazirliyi ilə ABŞ-ın Azərbaycandakı səfirliyi arasında “Amerika guşələri” proqramı çərçivəsində memoranduma uyğun olaraq, dekabr ayında Gəncə şəhər, habelə Salyan, Kürdəmir və Xaçmaz rayon mərkəzi kitabxanalarında bir sıra tədbirlər təşkil edilmişdir.

Salyan Rayon Mərkəzi Kitabxanasında “Texnologiya saatı” təşkil olunmuşdur.  ABŞ-ın Azərbaycandakı səfirliyinin əməkdaşı Tereza Dikson və Bakı Amerika Mərkəzinin əməkdaşı Şölə Eminbəyli 3D printer, robotlar, elektron innovativ intellektual oyunlar və digər avadanlıqlar haqqında tədbir iştirakçılarına məlumat vermiş və onların suallarını cavablandırmışlar.

Kürdəmir Rayon Mərkəzi Kitabxanasında fəaliyyət göstərən “Amerika guşəsi”ndə də texnologiya aylığı çərçivəsində tədbir keçirilmişdir. Texnologiya saatında səfirlik tərəfindən gətirilmiş avadanlıqlar “Amerika guşəsi”nin bütün iştirakçılarına təqdim olunmuş və onlar haqqında geniş məlumat verilmişdir. Eyni zamanda, ABŞ-ın donanma kapitanı və NASA-nın qadın astronavtı Haydi Stefanişin-Payper ilə görüş təşkil edilmişdir. Görüş astronavt Haydi Stefanişin-Payperin hazırladığı “Mənim əhvalatım” adlı videoçarxın təqdimatı ilə başlamışdır. Astronavtın məktəb illərindən başlayaraq ordudan tərxis olunanadək dövrü, xüsusən kosmosa uçduğu 12 və 16 günlük iki səfərini əks etdirən foto-şəkillər iştirakçılar tərəfindən maraqla qarşılanmışdır. Astronavt Haydi Stefanişin-Payper özü, ailəsi və kosmosa səfəri ilə əlaqədar iştirakçıları maraqlandıran sualları cavablandırmışdır. İndiyədək 500 nəfərə yaxın adamın kosmosa uçduğunu, onlardan 35-nin qadın olduğunu qeyd etmişdir.

Kürdəmir “Amerika guşəsi”ndə ingilis dili tədris köməkçisi Braden Alihsan ilə də görüş təşkil edilmişdir. Tədbirdə məktəblilər, müəllimlər və gənclər iştirak etmişlər. Tədbir zamanı Braden Alihsan “ABŞ-da bayramlar” mövzusunda təqdimatla tədbir iştirakçılarına Amerikada qış aylarında keçirilən bayramlar haqqında geniş məlumat vermişdir.

Gəncə Şəhər Mərkəzi Kitabxanasında fəaliyyət göstərən “Amerika guşəsi”ndə müxtəlif mövzuları əhatə edən kurslar barədə söhbət açılmışdır. İngilis dili tədrisçisi Mary Boehmer “ABŞ-da bayramlar” mövzusunda təqdimat etmişdir. Təqdimatdan sonra iştirakçılar Azərbaycanın milli bayramları haqqında bildiklərini qonaqla bölüşmüşlər.

Xaçmaz Rayon Mərkəzi Kitabxanasında fəaliyyət göstərən “Amerika guşəsi”ndə ingilis dili tədris köməkçisi Ceyms Nadelin “ABŞ-da bayramlar” adlı təqdimatı keçirilmişdir. Təqdimatda natiq ABŞ-da keçirilən bayramlar haqqında ətraflı məlumat vermişdir. Tədbirin sonunda C.Nadel iştirakçıların suallarını cavablandırmışdır.

Belə tədbirlər “Amerika guşələri”ndə 2018-ci ildə də davam etdiriləcək.

M.MÜKƏRRƏMOĞLU,
“Xalq qəzeti”