Daşkənddə rus dilində çap olunan “Taşkentskaya pravda” qəzeti Sergey Mixaylovun qədim Gəncə şəhəri haqqında “Xəzinələr şəhəri” adlı məqaləsini dərc edib.

Məqalədə Gəncənin Böyük İpək Yolu üzərində yerləşdiyi, dahi Nizami Gəncəvinin yurdu və bu şəhərin Azərbaycanın tarixində mühüm rol oynadığı qeyd edilir. Həmçinin materialda Gəncənin tarixi haqqında da məlumat öz əksini tapıb.

Yazıda Nizami Gəncəvinin əsərlərindən söhbət açılır, böyük şairin məqbərəsinin bu şəhərin yaxınlığında olduğu bildirilir. Tarix boyu Gəncə sənətkarlarının gildən hazırladıqları müxtəlif qablar, keramika məmulatları, həmçinin bu şəhərdə toxunan xalçalar, hazırlanan zərgərlik məhsullarının bütün dünyada məşhur olduğu xüsusi vurğulanır.

Məqalədə bu günün möhtəşəm , müasir Gəncəsindən də söhbət açılır. Bildirilir ki, bu qədim şəhərdəki Xan bağı yalnız Azərbaycanın deyil, bütün Qafqazın ən böyük parklarından biridir. Şəhərdəki ulu öndər Heydər Əliyevin adını daşıyan park-kompleks isə dünyanın ən böyük beş parkı siyahısına daxildir.

Ülviyyə VAHİDQIZI,
“Xalq qəzeti”