Özbəkistandakı  səfirliyimizin  nəzdindəki  Heydər Əliyev adına Azərbaycan Mədəniyyət Mərkəzinin layihəsi ilə Daşkənddə “Azərbaycan musiqisinin inciləri” adlı disk  işıq üzü görüb.  Diskin buraxılmasında  əsas məqsəd  Azərbaycanın təbliği və ölkəmiz haqqında  obyektiv məlumat verməkdir.

“Azərbaycan musiqisinin inciləri” adlı musiqi diskində Üzeyir Hacıbəylinin “Koroğlu uverturası”, “Aşıqsayağı”, “Arşın mal alan” – da qızların xoru”, Fikrət Əmirovun “Mən səni araram”, “Kürdovşarı”, Qara Qarayevin “İldırımlı yollarla”, “Yeddi gözəl” baletləri, həm də XX əsrin Azərbaycan musiqisinin şah əsərləri hesab olunan Müslüm Maqomayevin “Azərbaycan”, “Sənsiz”, Rəşid Behbudovun “Ay Laçın”, “Nazəndə sevgilim yadıma düşdü”, “Ana”, Şövkət Ələkbərovanın “Azərbaycanım”, “Axşam”, Zeynəb Xanlarovanın “Kimə  qaldı?”, “Cavanlığım”, “Sən mənimsən, Qarabağ” və s. hitləri  öz əksini tapıb.

Həmçinin  Alim Qasımovun “Əziz dostum”, “Xatirələr”, Akif İslamzadənin “Ala gözlüm”, Flora Kərimovanın “Əzizim”, “Darıxıram sənin üçün, Şuşam”,  Azərinin “Çırpınırdı Qara dəniz”, Elnarə Abdullayevanın “Azərbaycanım mənim”, Mirələm Mirələmovun “Sənsiz” mahnıları musiqi incilərimiz sırasına daxil edilərək diskdə yerləşdirilib.

Ülviyyə VAHİDQIZI,
“Xalq qəzeti”