Üzeyir Hacıbəyli adına Bakı Musiqi Akademiyasının təşəbbüsü ilə görkəmli musiqişünas alim, Əməkdar incəsənət xadimi  Elmira Abbasovanın həyat və yaradıcılğı  ilə bağlı elmi-nəzəri konfrans keçirilib. Konfrans musiqişünas alimin  85 illik yubileyinə həsr olunub.

BMA-nın rektoru, Xalq artisti, professor Fərhad Bədəlbəyli görkəmli alimin musiqi mədəniyyətimizin inkişafındakı xidmətlərindən söz açdı. Elmira Abbasovanın elmi-nəzəri fəaliyyətini yüksək dəyərləndirdi.

Konfransda Mədəniyyət və İncəsənət Universitetinin rektoru, professor Fərəh Əliyeva alimin Azərbaycan musiqişünaslığına öz adını əbədi həkk etdirdiyini bildirdi. Qeyd etdi ki, Elmira Abbasova Azərbaycan musiqi tarixinin inkişafı ilə yanaşı, XX əsr milli bəstəkarlıq məktəbinin görkəmli nümayəndələrinin yaradıcılığının dərindən tədqiqində və öyrənilməsində misilsiz rol oynayıb. O, hələ 1955-ci ildə Azərbaycan musiqişünaslığında “Muğam Azərbaycan bəstəkarlarının yaradıcılığında” adlı yeni bir mövzu açmışdır.

Əməkdar incəsənət xadimləri Gülnaz Abdullazadə bildirdi ki, onun elmi-tədqiqatçı kimi fəaliyyəti xüsusilə  Ü.Hacıbəyli yaradıcılığı ilə bağlıdır. E.Abasova dahi bəstəkarın həyat və yaradıcılığına 5 kitab, çox sayda elmi məqalə və oçerklər həsr etmişdir.

Sonra tədbirdə İmruz Əfəndiyeva, Zümrüd Axundova, Ülviyyə İmanova və digərlərinin məruzələri dinlənilib.

Elmi-nəzəri konfransda  alimin yaradıcılığını əks etdirən videoçarx nümayiş olunub. Sonda  alimin xatirəsinə həsr edilmiş konsert proqramı təqdim edilib.

Ülviyyə VAHİDQIZI,
“Xalq qəzeti”