Azərbaycan Milli Elmlər Akademiyasının (AMEA) Riyaziyyat və Mexanika İnstitutunda (RMİ) görkəmli riyaziyyatçı alim, fizika-riyaziyyat elmləri doktoru, Əməkdar elm xadimi, akademik Akif Hacıyevin 80 illik yubileyinə həsr olunmuş “Riyaziyyat və mexanikanın müasir problemləri” mövzusunda ikigünlük beynəlxalq elmi konfrans işə başlayıb.

AZƏRTAC xəbər verir ki, Azərbaycan, Türkiyə, Rusiya və digər ölkələrdən olan alim və mütəxəssislərin iştirak etdikləri tədbirdə RMİ-nin direktoru, AMEA-nın müxbir üzvü Misir Mərdanov görkəmli alim A.Hacıyevin mənalı ömür yolundan, elmi yaradıcılığından, qazandığı nailiyyətlərdən danışıb.

Bildirilib ki, A.Hacıyev 1960-cı ildə Azərbaycan Dövlət Universitetinin (indiki Bakı Dövlət Universiteti) mexanika-riyaziyyat fakültəsini bitirib. Azərbaycan Elmlər Akademiyasının Riyaziyyat və Mexanika İnstitutunda elmi işçi, şöbə müdiri vəzifələrində çalışıb. O, 1964-cü ildə namizədlik, 1982-ci ildə doktorluq dissertasiyaları müdafiə edib. 1989-cu ildə akademiyanın müxbir üzvü, 2001-ci ildə isə həqiqi üzvü seçilib.

Görkəmli alim AMEA-nın Fizika-Riyaziyyat və Texnika Elmləri Bölməsinin akademik-katibi, Riyaziyyat və Mexanika İnstitutunun direktoru, 2013-cü ildən isə AMEA-nın vitse-prezidenti olub.

Müasir riyaziyyat elminin inkişafına dəyərli töhfələr verən akademik A.Hacıyev çoxlu sayda elmi məqalələrin və dörd monoqrafiyanın müəllifidir.

Alimin riyaziyyatın müxtəlif aktual problemlərini, o cümlədən operatorlar nəzəriyyəsi, sinqulyar inteqrallar və digər istiqamətləri əhatə edən araşdırmaları yüksək qiymətləndirilib. Onun riyazi analizin bir sıra sahələrinə dair əldə etdiyi nəticələr xüsusilə böyük maraq doğurub. Akademik A.Hacıyevin rəhbərliyi altında Azərbaycanda və Türkiyədə onlarla doktorluq dissertasiyaları müdafiə olunub. Alim beynəlxalq simpozium, konfrans və forumlarda Azərbaycan elmini layiqincə təmsil edib.

Akademik A.Hacıyevin elmi və elmi-təşkilati fəaliyyəti yüksək dəyərləndirilib. Alim müxtəlif mükafatlara, xüsusilə “Şöhrət” ordeninə layiq görülüb.

Professor Nadir Süleymanov və digər çıxış edənlər akademik A.Hacıyevin elm sahəsində qazandığı uğurlardan söz açıb, onun xatirəsinin əziz tutulduğunu vurğulayıblar.

Konfransda “Statistik yığılma, ümumiləşməsi, kəsilməz variantı və Furye-Stiltyes çevirməsinə tətbiqləri”, “Özlüelastikiyyət nəzəriyyəsinin ümumi-kvazi statik məsələsinin həll üsulu və onun tətbiqləri” və digər mövzularda elmi məruzələr dinlənilib, müzakirələr aparılıb.

Sonra “Funksional analiz”, “Xüsusi törəməli diferensial tənliklər”, “Operatorlar nəzəriyyəsi və spektral analiz”, “Tətbiqi analiz”, “Riyazi fizika” və s. üzrə bölmə iclasları olub.