Bu günlərdə  Masallı Dövlət Regional Kollecində “Xalq qəzeti”nin bölgə müxbiri, tanınmış şair-publisist Əli Nəcəfxanlının yenicə çap olunmuş “Söz yerə düşməsin” adlı kitabının təqdimatı keçirilib. Qeyd edək ki, müəllifin sayca 5-ci kitabı olan bu topluda son illərdə qələmə aldığı şeirlər və ona həsr olunan poetik nümunələrin bir qismi yer alıb.

Tədbiri giriş sözü ilə açan kollecin direktoru Vidadi Nəzərov Əli Nəcəfxanlının həyat və yaradıcılığı haqqında məlumat verərək kitabın məziyyətlərindən söz açıb. “Yeni həyat” qəzetinin baş redaktor müavini Rəsul Rzayev, kollecin müəllimləri Kamalə İmanova, Zahir Əmənov, şair Nurməmməd Ağa, Kəlbəhüseynli kənd tam orta məktəbinin direktoru Hamlet Quliyev və başqaları şairin yeni kitabı haqqında fikirlərini bölüşərək, şeirlərindən misallar gətirib, müəllifə yeni yaradıcılıq uğurları arzulayıblar.

Aktyor Camaləddin Əliyev və kollec tələbələrinin ifasında müəllifin şeirlərindən ibarət kompozisiya təqdim olunub.

Sonda Əli Nəcəfxanlı tədbirə toplaşanlara minnətdarlığını bildirərək, yeni şeirlərini oxuyub və kitabının nüsxələrini imzalayaraq tələbələrə hədiyyə edib.

Hazırladı:
Anar TURAN,
“Xalq qəzeti”