Mədəniyyət və  turizm naziri   Əbülfəs Qarayevin rəhbərliyi ilə nümayəndə heyəti Sudanın Xartum şəhərində keçirilən İSESCO-ya üzv ölkələrin mədəniyyət nazirlərinin 10-cu konfransında iştirak edib. Bu  barədə nazirliyin  mətbuat xidməti məlumat yayıb.

Məlumat üçün bildirək ki, 2015-ci il noyabrın 23-dən 25-dək  Bakı şəhərində baş tutmuş İSESCO İcraiyyə Şurasının iclası və 12-ci Baş Konfransı (BK)  zamanı Azərbaycan növbəti üç il müddətinə BK-nın sədri seçilmişdir. Bununla əlaqədar Azərbaycan mədəniyyət  nazirlərinin
10-cu konfransına rəhbərlik etmişdir.

Konfransda İSESCO  baş direktorunun təşkilatın son iki illik fəaliyyətinə dair hesabat  dinlənildi. Müzakirə zamanı Azərbaycan tərəfinin təklifi  “Dünyada İslam irsinin qorunmasına dair”  Bəyannaməyə Ermənistan tərəfindən işğal  olunmuş Qarabağ bölgəsində mədəni irsin vəziyyətinin araşdırılması məsələsi daxil edilmişdir.

Nazir çıxış edərək son iki ildə ölkəmizin uğurları, İslam dünyası ilə əməkdaşlığı, Prezident İlham Əliyev tərəfindən elan edilmiş “İslam Həmrəyliyi ili” çərçivəsində təşkil olunan tədbirlər, xüsusilə İslam Həmrəyliyi  Oyunları, 4-cü Ümumdünya Mədəniyyətlərarası Dialoq Forumu, Şəkinin UNESCO tərəfindən yaradıcı şəhər elan olunmasının əhəmiyyəti, 2018-ci ildə Naxçıvanın İslam Mədəniyyətinin Paytaxtı seçilməsi  barədə məlumat verdi. Nazir müsəlman ölkələrini  “Dünya EXPO – 2025”  sərgisinə İSESCO və İslam Əməkdaşlıq Təşkilatının  yeganə namizədi  olan Azərbaycan  paytaxtı  Bakı  şəhərinin  namizədliyini dəstəkləməyə çağırdı.

Əbülfəs Qarayev tədbir çərçivəsində İSESCO-nun baş direktoru, Türkiyə, Bəhreyn, Sudan, Banqladeş, İraq və digər ölkələrdən olan həmkarları ilə görüşərək qarşılıqlı əməkdaşlıq məsələlərini müzakirə etmişdir.

M.MÜKƏRRƏMOĞLU,
“Xalq qəzeti”