Tanınmış yazıçı-publisist Mustafa Çəmənlinin anadan olmasının 70 illiyi doğulub-böyüdüyü Ağdam rayonunda da təntənə ilə qeyd edilmişdir.

Rayon Mədəniyyət evinin böyük salonunda respublikanın bir qrup söz ustasının iştirakı ilə keçirilən yubiley mərasimində Mustafa Çəmənlinin mənalı həyat yolu, jurnalist-naşirlik və ədəbi-bədii fəaliyyəti barədə geniş söhbət açılmışdır.

İlk yazılarını orta məktəb illərindən qələmə almağa və çap etdirməyə başlayan 70 yaşlı yazar və tədqiqatçının bu gün də zənginləşməkdə olan bədii-sənədli irsində Qarabağın dünəni və bugünündən bəhs edən müxtəlif janrlı yazıların geniş yer tutduğu toplantıda razılıqla vurğulanmış, ədibə yeni yaradıcılıq uğurları arzulanmışdır.

Mustafa Çəmənli bir çoxu əsərlərinin propotipi və qəhrəmanı olan həmyerliləri qarşısında yaradıcılıq hesabatı verərək, həmişə onların zəngin mənəviyyatından ilham və güc aldığını söyləmiş, Azərbaycan oxucusunun yüksək zövq və tələbatını cavablandırmağa çalışdığını qeyd etmişdir.

 Azərbaycan Yazıçılar Birliyinin katibi İlqar Fəhmi istedadlı yazıçı, yorulmaz araşdırmaçı, mahir naşir Mustafa Çəmənlinin məhsuldar və çoxyönlü yaradıcılığı, əsərlərinin mövzu aktuallığı, yüksək ideya və sənətkarlıq xüsusiyyətləri ilə çağdaş yazarlar arasında nüfuzlu mövqe qazandığını, ədəbiyyatımıza və jurnalistikamıza dəyərli əsərlər bəxş etdiyini bildirmişdir. Qocaman şair-ədəbiyyatşünas Ənvər Əhməd, tanınmış yazıçı-dramaturq Əli Əmirli, Əməkdar incəsənət xadimi Məhərrəm Bədirzadə, Əməkdar jurnalist Tahir Aydınoğlu da yubilyarın tarixi və müasir mövzularda yazdığı roman, povest və hekayələrinin, günün sevinc və ağrılarını salnamələşdirən sənədli-publisistik yazılar silsiləsinin bədii-estetik məziyyətlərindən ətraflı söhbət açmış, ona xoş diləklərini çatdırmışlar.

Ağdam Rayon İcra Hakimiyyətinin başçısı Raqub Məmmədov Qarabağdan çıxmış məşhur yazıçı, şair və jurnalistlərin sənət yolunu uğurla davam etdirən Mustafa Çəmənlinin bədii-sənədli yaradıcılığının milli-mənəvi dəyərlərimizlə sıx təmasda formalaşdığını, onun həyat və fəaliyyətinin doğma torpaqda maraqla izləndiyini və yüksək dəyərləndirildiyini qeyd etmişdir. Yazıçının daimi oxucusu olduğunu deyən başçı yubilyarı rayon ictimaiyyəti adından səmimi təbrik edərək, ona xatirə hədiyyəsi təqdim etmişdir.

Sonda Mustafa Çəmənli ömrünün əlamətdar hadisəsinə göstərilən həssaslığa, 70 illik həyat və yaradıcılıq yolu barədə söylənən xoş sözlərə görə həmyerlilərinə və həmkarlarına dərin minnətdarlığını bildirmişdir.

Mərasimində Ağdam Dövlət Dram Teatrının aktyorları yubilyarın əsərlərindən epizodları səsləndirmiş, populyarlıq qazanmış qəhrəmanlarını canlandırmışlar. Rayonun dünya şöhrətli “Şur” ansamblı və uşaq xor kollektivi Mustafa Çəmənlinin araşdırmalarında geniş yer tutan milli musiqimizin ən yaxşı nümunələri ilə yubiley məclisini təravətləndirmişlər.

“Xalq qəzeti”