Tanınmış gürcü rejissoru, SSRİ Xalq artisti Robert Sturuanın quruluş verdiyi  tamaşa  Azərbaycan Dövlət Musiqili Teatrının səhnəsində  göstərilib. Tamaşa  Şota Rustaveli adına Tbilisi Dövlət Dram Teatrının  ölkəmizə qastrol səfəri çərçivəsində nümayiş olunub.

Amerika dramaturqu Terrens Maknellinin “Mariya Kallas – Dərs” pyesi əsasında  hazırlanmış bu  tamaşa teatrsevənlərə xoş anlar  yaşatdı.  Əsər konservatoriya müəllimi  Mariya Kallasın  həyatından bəhs edir.  Mariyanın keçdiyi dərslər əsasında qurulmuş süjetin  ana xəttini onun şəxsi həyatı və karyerası barədə xatirələri təşkil edir.

Qastrol səfəri Azərbaycan Respublikası Mədəniyyət və Turizm Nazirliyinin təşkilatçılığı ilə baş tutub. Azərbaycan Dövlət Musiqili Teatrın direktoru Əliqismət Lalayev bildirib ki,  bu səfər iki ölkə arasında mədəniyyətlərarası dialoqun çox gözəl bir nümunəsidir. Dünya söhrətli rejissor  Robert Sturuanın  hazırladığı tamaşanın  ölkəmizdə  təqdim olunması çox təqdirəlayiqdir.

Ülviyyə VAHİDQIZI,
“Xalq qəzeti”