ABŞ-ın Nyu-York şəhərində fəaliyyət gösətərən Azərbaycan Amerika Mədəniyyət Mərkəzinin təşkilatçılığı ilə Azərbaycanın Dövlət Bayrağı Günü qeyd edilib.

Diasporla İş üzrə Dövlət Komitəsindən verilən məlumatda deyilir ki, bayram tədbirində Nyu-Yorkdakı Azərbaycan və türk diaspor təşkilatlarının rəhbərləri iştirak ediblər. Mərkəzin sədri Zöhrə Şərifi qonaqları salamlayaraq, Dövlət Bayrağı Günü ilə bağlı onlara qısa məlumat verib.

Daha sonra Azərbaycan Nyu-York Assosiasiyasının prezidenti Əli Nəsibov çıxış edərək, bugünkü Azərbaycan Bayrağının tarixi barədə danışıb, orada əks olunan rənglərin, ay, ulduzun mənası haqqında qonaqları məlumatlandırıb.

Tədbirdə çıxış edən Türk Amerika giresunlular dərnəyinin rəhbəri İlhan Kadalak, Türk Haras Birliyinin sədri Aysel Demirkan və başqaları Türkiyə–Azərbaycan qardaşlığından, bu münasibətlərin ABŞ-dakı azərbaycanlılarla türklər arasında müşahidə edilməsindən məmnunluqlarını ifadə ediblər. Tədbirin təşkilatçısı olan Azərbaycan Amerika Mədəniyyət Mərkəzində azərbaycanlı, türk, hətta yəhudilərin təmsil olunmasının əhəmiyyəti xüsusi vurğulanıb. Türk dərnək rəhbərləri qeyd ediblər ki, Amerikada yaşayan türklər hər zaman Azərbaycan xalqının yanındadır və Azərbaycan bayrağının daim dalğalanması üçün hər cür dəstəyi göstərməyə hazırdırlar.

Samirə ƏLİYEVA,
“Xalq qəzeti”