Özbəkistanın kultura.uz və uchildiz.uz portalları məşhur rəssam Səttar Bəhlulzadə haqqında məqalələr dərc edib. Məqalələr özbək və rus dillərində yayımlanıb.

Məqalədə Xalq rəssamının uşaqlıq və gənclik illəri, rəssamlığa həvəsi, təhsil aldığı illər, Əzim Əzimzadənin ona qayğısı və digər məqamlar öz əksini tapıb.

Məqalələrdə rəssamın məşhur “Kəpəzin göz yaşları”, "Azərbaycan nağılı", "Suraxanı atəşgahı", "Naxçıvan. Axşamçağı Ordubad bağlarında", "Bakıda atəşfəşanlıq", "Suraxanı atəşgahı", “Əmircan", "Neft daşları", “Qudyalçayın yolu”, “Şahdağın ətəyində”, “Qudyalçay vadisi”, “Qızbənövşəyə gedən yol” və digər əsərlərindən söz açılır. Yazılarda Səttar Bəhlulzadənin əsərlərindən illüstrasiyalar öz əksini tapıb.

Qeyd edək ki, Səttar Bəhlulzadənin 100 illik yubileyi 2009-cu ildə UNESCO-nun xətti ilə dünyada qeyd edilmişdir.

Rəssamın mənzərə-peyzajlarında, natürmortlarında xalq yaradıcılığı motivləri duyulur.

Onun əsərləri Əlcəzair, Misir, Livan, Kanada, Belçika, Fransa, Yaponiya və dünyanın bir sıra başqa ölkələrində sərgilərdə nümayiş etdirilib. Dünyanın tanınmış muzeylərində Səttar Bəhlulzadənin əsərləri daimi eksponatlar sırasındadır.

Ülviyyə VAHİDQIZI,
“Xalq qəzeti”