Bu günlərdə Azərbaycanın  milli incəsənət və Qazaxıstanın təsviri sənət muzeyləri arasında əməkdaşlıq müqaviləsi imzalanmışdır.  Azərbaycan Milli İncəsənət  Muzeyinin  direktoru Çingiz Fərzəliyev respublikamıza gəlmiş  qazaxıstanlı qonaqları salamayaraq ölkələrimizin muzeyləri arasındakı əlaqələrin və səmərəli əməkdaşlığın genişlənməsindən məmnunluğunu ifadə etmişdir.

O,  imzalanan müqavilənin  bu mədəniyyət müəssisələrinin əməkdaşlığının daha da inkişaf etdirilməsi, xalqlarımız arasında dostluq münasibətlərinin möhkəmləndirilməsi məqsədi daşıdığını   bildirmişdir.

Qazaxıstanın Təsviri Sənət Muzeyinin direktoru Ainabek Ospanov  çıxışında bu müqavilənin  önəmli hadisə olduğunu qeyd edərək  bundan sonrakı əlaqələrin genişlənməsinə, təcrübə mübadiləsinə öz layiqli töhfəsini verəcəyinə əminliyini ifadə etmişdir.

Müqavilə hər iki muzeyin qarşılıqlı elmi-tədqiqat və bərpa-konservasiya işinin aparılacağı,  muzey işçilərinin təcrübə mübadiləsinin yaradılacağı , birgə sərgilərin hazırlanacağını bəyan edir. Eyni zamanda,  bu əməkdaşlıq müqaviləsinin Azərbaycanda Qazaxıstan mədəniyyətinin, Qazaxıstanda isə Azərbaycan mədəniyyətinin təbliğinə xidmət edəcəyi bildirilmişdir.

İmzalanma mərasimində Qazaxıstanın Azərbaycandakı səfirliyinin nümayəndələri də iştirak etmişlər.

M. MÜKƏRRƏMOĞLU,
“Xalq qəzeti”